Футзалдан Қазақстан құрамасы ФИФА рейтингінде көтерілді

Қазақстан футзал құрамасы ФИФА-ның жаңартылған рейтингінде өз позициясын жақсартып, Украина футзал құрамасы командасын басып озды.

Қазақстан құрамасы 1403,8 ұпаймен бір саты жоғары көтеріліп, әлемдік рейтингте сегізінші орынға шықты (+3,2 ұпай). Ал Украина құрамасы 14,92 ұпай жоғалтып, тоғызыншы орынға төмендеді.

Рейтингтің көш басында 1684,97 ұпаймен Бразилия футзал құрамасы тұр. Екінші орында — 1575,32 ұпай жинаған Португалия футзал құрамасы. Үздік үштікті 1574,39 ұпаймен Испания футзал құрамасы түйіндеп тұр.

Футзалдан әлемдік рейтингтің үздік ондығы:

1. Бразилия — 1684,97 ұпай

2. Португалия — 1575,32

3. Испания — 1574,39

4. Аргентина — 1513,38

5. Иран — 1507,71

6. Марокко — 1486,53

7. Ресей — 1430,32

8. Қазақстан (+1) — 1403,8

9. Украина (-1) — 1400,89

10. Франция — 1397,25.

2026 жылдың 16 қаңтарында Рикардо Камара Собрал Қазақстан футзал құрамасының бас бапкері қызметіне тағайындалды. Бразилиялық маман, көпшілікке Какау есімімен танымал, бұған дейін де ұлттық құраманы 2013-2018 жылдары жаттықтырған болатын. Оның жетекшілігімен Қазақстан құрамасы UEFA Futsal Euro 2016 турнирінің қола жүлдегері атанған.