Ислам Чесноков ҚПЛ-ге қатысты шешім қабылдады

«Қазақстан құрамасы мен шотландиялық “Хартс” клубының жартылай қорғаушысы Ислам Чесноков елге қайту нұсқасын қарастырып жатқан жоқ.

Бұған дейін БАҚ-та футболшыны семейлік “Елімайға” жалға беру мүмкіндігі туралы ақпарат тараған болатын. Алайда менің мәліметім бойынша, вингер маусым аяқталғаннан кейін жаңа маусымға дайындалу үшін шотландиялық клубпен толыққанды оқу-жаттығу жиынын өткізуді жоспарлап отыр.

Сондай-ақ қазіргі таңда “Елімай” клубында да қазақстандық футболшыны жалға алу нұсқасы қарастырылып жатқан жоқ», — деп жазады Аманбаев өз телеграм-арнасында.

Чесноков “Хартс” клубына биылғы жылдың 6 қаңтарында ауысқан. Қазіргі таңда ол шотландиялық команда сапында сегіз матч өткізіп, бір гол соқты.

Бұған дейін БАҚ-та Чесноков пен “Ахматтың” вингері Ғалымжан Кенжебек “Елімайға” жалға ауысуы мүмкін екені туралы ақпарат тараған еді.