«Жеңістің» экс-ойыншысы – Анарбеков туралы: тезірек Еуропаға кетуі керек

«Жеңістің» бұрынғы жартылай қорғаушысы Василиос Карагунис ASnews.kz сайтына берген сұхбатында Темірлан Анарбековтың топ-чемпионаттарда бағын сынайтын кезі келгенін айтты.

«Оның үлкен жетістіктерге жететініне сенемін, ол бұған лайықты! Ең жоғары деңгейде тәжірибе жинау үшін оның мүмкіндігінше тезірек кеткенін қалаймын. Темірлан алдымен «Жеңісте» өзін дәлелдесе, кейін «Қайрат» сапында Чемпиондар лигасының матчтарында жоғары деңгей көрсетті», – деді грекиялық футболшы.

Бұған дейін «Қайрат» қақпашысы Темірлан Анарбековке португалиялық алпауыттар – «Бенфика» мен «Спортинг» қызығушылық танытып отырғаны хабарланған болатын.

32 жастағы Василиос Карагунис 2024 жылғы маусымның бірінші жартысында «Жеңіс» сапында өнер көрсетіп, ҚПЛ-да 13 матч өткізді.