Дастан Сәтпаев "Қайрат" сапында 50 матч өткізді

Қазақстан құрамасының 17 жастағы шабуылшысы Дастан Сәтпаев алматылық «Қайрат» сапындағы 50-матчын өткізіп, мерейтойлық межеге жетті, деп хабарлайды клубтың баспасөз қызметі.

Форвард үшін мерейтойлық ойын семейлік «Елімайға» қарсы өз алаңындағы кездесу болды. Ол «сары-қаралар» сапында 2024 жылдың 26 мамырында Оралдың «Ақжайығына» қарсы Лига кубогы аясындағы матчта дебют жасаған еді. Сол ойында «Қайрат» 9:0 есебімен ірі жеңіске жеткен. Қазіргі таңда оның еншісінде 50 матч, 22 гол және 10 нәтижелі пас бар.

Айта кетейік, 2026 жылдың тамыз айында 18 жасқа толған соң, Сәтпаев лондондық «Челсиге» қосылады.

Қазіргі уақытта «Қайрат» Қазақстан Премьер-лигасының турнирлік кестесінде 15 ұпаймен көш бастап тұр.